Ko e OurDNA Browser ko e teitapeisi 'oku lava ke fai ai ha fekumi pea 'oku 'atā ki ha taha 'o e fakamā'opo'opo 'o e ngaahi teita 'i he faikehekehe fakatukufakaholo. Te ke tokoni'i 'a e kau toketā mo e kau fakatotolo:
'E lava 'e he kau toketā mo e kau fakatotolo ke sio ki he ngaahi feliliu'aki mo e pēteni 'i he fakamatala, kae 'ikai pe ko e ha'u 'a e fakamatala meia hai. Ko e OurDNA Browser ko e konga ia 'o e netiueka fakamāmani lahi, pea ko e fakalahi lelei ki he ngaahi naunau kuo 'osi 'iai.
Ko e Teita OurDNA ko e pangikē malu 'o e ngaahi fakamatala fakasino mo mo'uilelei. Te ne tauhi ke malu 'a e ngaahi fakamatala tukufakaholo mo felave'i fakamo'uilelei 'a e kakai 'oku nau kau 'i he OurDNA ki he ngaahi fakatotolo fakafaito'o he kaha'u.
Ko e Teita OurDNA ko e me'a ngāue ia 'e ngaue'aki 'e he kau fakatotolo kuo fakangofua 'i he mo'uilelei mo e tafa'aki fakafaito'o ki he lelei 'a e ngaahi komiunití 'Aositelēlia. Ko e fakatotolo kuopau ke fakafetaulaki ki he ngaahi makatu'unga 'a ia 'oku lolotonga ngaue ki ai 'a e kau fale'i fakamatakali 'a e OurDNA. He'ikai lava 'e he kau fakatotolo ke nau sio ki ha fakamatala fakaikiiki fakafo'ituitui 'o e kakai 'oku nau kai mai ki he OurDNA.
'Oku taumu'a 'a e OurDNA ki he uesia lahi taha 'e lava 'i he fakatotolo fakafaito'o mo mo'uilelei 'aki hono poupou'i 'a e poloseki fakatotolo fou 'i he pangikē pau 'o e DNA mo e selo. 'E tānaki 'e he OurDNA mo tauhi ke malu 'a e toto kuo 'omi, ngaahi selo toto mo e DNA ki he kau fakatotolo ke fai hono ako he kaha'u.
'E tokoni 'a e pangikē samipolo 'a e OurDNA ke fakafaingofua'i 'a e fakatotolo fakamo'uilelei mo fakafaito'o 'e lelei ki he komiunití 'Aositelēlia he kaha'u.
Kapau 'oku 'ikai te ke lava ma'u 'a e tali 'oku ke fekumi ki ai, fetu'utaki mai kiate kimautolu.
Kapau te ke kau mai ki he OurDNA, 'e fakataha'i ho fakamatala tukufakaholo mo e ngaahi fakamatala tukufakaholo 'a e kakai kehe tokolahi, fakamā'opo'opo, mo tuku atu ki he teitapeisi 'oku 'atā ki ha taha pe ke tokoni ki he kau toketā mo e kau fakatotolo ke sio ki he feliliuaki mo e pēteni 'i he teita. Ko e kakai 'oku nau ngāue'aki 'a e teitapeisi ko eni 'oku 'atā ki ha taha pe 'e 'ikai te nau lava ke sio pe ko e ha'u 'a e fakamatala mei fē.
'E lava he kau fakatotolo mo'uilelei mo fakafaito'o 'i tu'a 'i he OurDNA mei he tapa pe 'o māmani ke 'apalai mai ke sio mo ngāue mo ho samipolo mo e fakamatala na'e tānaki fou 'i he poloseki OurDNA. 'Oku 'ikai malava ke fakafuofua'i 'a e ngāue'aki ho teita mo e samipolo 'i he kaha'u. Kaekehe, ko ho samipolo mo e teita 'e toki ngāue'aki pe ki he ngaahi ako kuo 'osi fakangofua faka'efika.
Fakatefito 'i he me'a na'a ke loto kiai, ko e teita ('ikai hā ai ho fakamatala fakafo'ituitui) 'e ala lava ke ngāue'aki 'i he ngaahi ako 'oku kau ai 'a e ngaahi potungāue fakapule'anga, hangē ko e Potungāue Mo'ui.
Ko e teita 'e ngalingali 'e 'ilo'i ai koe (ho fakamatala fakaikiiki fakafo'ituitui) 'e tauhi malu ia. 'E 'ikai te mau vahevahe 'a e fakamatala ko eni tukukehe kapau 'e fiema'u 'e lao ke mau fai ai pea 'ikai ha'amau toe fili. 'E toki hoko pe eni he ngaahi tūkunga 'oku hāhāmolofia 'o hangē ko hano fiema'u mai 'a e fakamatala 'i ha fakatotolo'i ha hia mamafa. Ko e ngāue'aki 'o e teita ko eni 'e ngāue pe ia 'o laine taha mo e ngaahi lao fakasiteiti pe fakapuleanga ki he ngaahi me'a fakapulipuli.
Ko e OurDNA Browser ko e koloa 'atā ki ha taha pē fakataumu'a ki he kau toketā mo e kau fakatotolo 'oku nau ako 'i he tukufakaholo mo e genomics. Ko e natula 'atā 'o e koloa ni ki ha taha pe 'oku 'uhinga ia 'oku lahiange 'a e kau toketā mo e kau fakatotolo te nau lava hū ki he Browser, 'o iku ai ki he ngaahi fakalakalaka fakasaienisi 'oku vaveange mo e ngaahi ola lelei fakamo'uilelei ma'ae ngaahi komiunití kau mai.
Ko e OurDNA Browser 'e lava pe ngāue'aki ki he 'ilo fakasaienisi, mahino'i leleiange 'a e ngaahi fokoutua fakaesino mo mo'uilelei, mo fakafuofua'i ha fokoutua tukufakaholo 'i he ngaahi komiunití 'oku 'ikai fakafofonga'i lelei. Ko kinautolu 'oku nau ngāue'aki 'a e Browser 'oku fiema'u ke nau tokanga ki he ola lelei ki he komiunití, uesia faka'efika, mo e lipooti lelei 'i he taimi 'oku nau ngāue ai mo e teita.
Ko e teita 'i he Browser kuo pau ke 'oua na'a ngāue'aki ke 'ilo'i ha taha kuo kau mai 'i he OurDNA pe ke fakatupu pe tauhi ha fakafaikehekehe fekau'aki mo e ngaahi komiunití.
Ko e teita 'e fakamā'opo'opo mei he fakamatala tukufakaholo 'oku 'atā 'i he OurDNA Browser 'e fakakau ia he ngaahi netiueka fakavaha'apule'anga 'o e teitapeisi gnomAD. gnomAD ko e naunau tukufakaholo 'oku taumu'a ke faka'ata mei ai 'a e faikehekehe fakamāmani lahi 'i ho fakakau mai 'a e ngaahi teita kuo fakamā'opo'opo mei he poloseki hangē ko e OurDNA 'i 'Amelika, 'Amelika Saute, 'Iulope, 'Afilika, 'Esia mo 'Aositelēlia. 'E lava hū ki heni 'a e kau toketā mo e kau fakatotolo ha tapa pe 'i māmani ke sio ki he ngaahi feliliuaki pe pēteni 'i he fakamatala, ka e 'ikai 'ilo pe ko e ha'u 'a e fakamatala mei fē.
Ko e 'i ai ko ia 'a e teitapeisi pe fakafofonga pe 'e taha, 'oku ne faka'atā 'a e kau toketā mo e kau fakatotolo fakamāmani lahi ke hū ki he ngaahi fakamatala 'oku nau fiema'u ke fakafuofua'i'aki mo mahino'i leleiange 'a e ngaahi mahaki kehekehe. Ko e teitapeisi gnomAd 'oku 'i he Broad Institute of MIT mo Harvard 'i Cambridge, Massachusetts.
Ko e kau fakatotolo fakafaito'o mo mo'uilelei kuo 'osi fakangofua 'i tu'a 'i he OurDNA 'e lava ke nau 'apalai ke sio mo ngāue'aki 'a e ngaahi samipolo mo e fakamatala 'oku tānaki fou he poloseki OurDNA. Ko ho samipolo mo e teita 'e ngāue'aki pe ki he ngaahi ako 'i he kaha'u kuo faka'atā faka'efika pea ki he 'uhinga pe na'a ke loto ki ai.
'I he taimi 'oku mau vahevahe atu ai ho'o teita pe samipolo mo e kau fakatotolo kuo faka'atā, te mau pule'i lelei ia ke malu mo to'o 'a e ngaahi fakaikiiki fakafo'ituitui 'e lava 'o tala ai ko koe. Te mau toki 'ave pe ki ha taha 'oku kole mai ke hū ki ho fakamatala mo'uilelei mo e tukufakaholo 'o kapau te nau loto ke 'oua na'a nau ngāue'aki e fakamatala ko ia ke 'ilo'i'aki koe.
Ko e kau fakatotolo kuo faka'atā mahalo pe 'oku nau 'i 'Aositelēlia pe 'i muli, kau ai 'i he ngaahi 'univesiti, falemahaki, ngaahi va'a fakatotolo fakafaito'o, mo e ngaahi kautaha 'oku 'ikai taumu'a ki ha tupu; pe ko e kau fakatotolo ko e konga kinautolu 'o e ngaahi kautaha 'oku taumu'a ki he tupu mei he ngaahi me'a fakasino, faletalavai, tekinolosia pe sivi.